Sua Eselénsia Ministra Solidariedade Sosiál no Inkluzaun, Verónica das Dores, bainhira hala’o vizita ba família afetadu dezastre naturais hatete, governu liuhusi Ministériu Solidariedade Sosiál no Inkluzaun (MSSI) garante katak, apoiu umanitária sufisiente ba vítima afetadu dezastre naturais iha territóriu nasionál.
Sua Eselénsia Ministra hato’o asuntu ne’e, bainhira hala’o distribuisaun apoiu umanitária ba uma-kain afetadu dezastre naturais iha Suku Maulau ho Fatubesi, Postu Administrativu Maubise, Munisípiu Ainaro, Domingu (21/06/2026).
Sua Eselénsia Ministra akresenta, dezastre naturais akontese tanba kauza husi kalamidade estrima, ne’ebé kauza Rai-halai, Mota-sa’e inklui tipu dezastre sira seluk, hodi hamosu estragus ba uma, plantasaun no animais inklui fatin turizmu kulturál no Uma-lisan barak hetan estragus totál.
Tanba ne’e, Sua Eselénsia Ministra husu ba komunidade sira, atu provizoriamente evakua ba fatin seguru hodi evita dezastre. Enkuantu governu hala’o ninia knaar hodi garante katak, família afetadu sira hetan tratamentu espesiál iha durante situasaun emerjénsia.
Entretantu ba Xefe Suku Maulau, Julião Martins ho Xefe Suku Fatubesi, Bonifásio Pereira Mendonça, Sua Eselénsia Ministra husu, atu bainhira foti dadus família afetadu dezastre naturais, labele prátika partidarizmu no familiarizmu, tanba governu taumatan ba ema hotu-hotu hanesan, katak Ministra.
Totál família afetadu Rai-halai (foho Auslau) husi Suku Maulau hamutuk 14, enkuantu husi Suku Fatubesi hamutuk 17. Daudaun ne’e família afetadu sira hela ona iha fatin seguru iha Postu Administrativu Maubise.
Mídia MSSI
