Ministra Solidariedade Sosiál no Inkluzaun, Verónica das Dores no Vise-Ministra Solidariedade Sosiál no Inkluzaun, Céu Brites ho ekipa hamutuk Autoridade Protesaun Sívil (APC-Sigla Portugés), fó asisténsia humanitária ba komunidade vítima insendiu iha Suku Fatumaquerec, Postu Administrativu Laclubar, Munisípiu Manatuto, Segunda-feira (06/07/2026).
Insendiu ne’e akontese hafoin konflitu entre komunidade Suku Orlalan no Suku Fatumaquerec, ne’ebé rezulta uma hamutuk 15 mak hetan estragus, kompostu husi uma 4 (ahi-han total), uma 5 (ahi-han naton) no uma hamutuk 6 mak hetan estragus kaman.
Husi akontesimentu refere, vítima sira hamutuk uma-kain 22 mak evakua ona ba Cristã Ágape-Cribas, no agora dadaun hetan ona apoiu emerjénsia nesesidades básikas husi MSSI no APC.
Iha okaziaun ne’e, Ministra Solidariedade Sosiál no Inkluzaun, Verónica das Dores, akompaña husi Vise-Ministra MSSI, Céu Brites mós enkoraza vítima sira atu nafatin forte no iha esperansa.
“Imi la mesak, maibé konta ho ami. Halo deit orasaun no labele halo foer imi nia liman. Nafatin korajen hodi buka solusaun di’ak ba imi nia moris iha futuru,” dehan Ministra.
Mídia MSSI
