Ministériu Solidariedade Sosiál no Inkluzaun (MSSI), liuhusi Diresaun Nasionál Reinsersaun Komunitária (DNRC), hala’o sensibilizasaun Lei Protesaun ba Labarik no Joven iha Perigu (LPLJP), iha Postu Administrativu Balibo, Munisípiu Bobonaro, Kinta-feira (17/10/2024). Sensibilizasaun ida-ne’e abertura husi Diretór Sentru Solidariedade Sosiál no Inkluzaun Munisípiu Bobonaro, Acasio Goncalves, ho nia objetivu prinsipál atu habeer dalan ba implementasaun Lei Nú. 6/2023, LPLJP iha Timor-Leste, ne’ebé nakait ho polítika governu nian kona-ba protesaun ba labarik, tanba labarik iha direitu ba protesaun espesiál husi parte família, husi komunidade no Estadu, liuliu hasoru formas abandonu (ka, soe no husik hela), diskriminasaun, violénsia, opresaun, abuzu seksuál ho esplorasaun.
Labarik sira goza direitus tomak ne’ebé rekoñese universalmente, no mós direitus ne’ebé konsagra iha konvensoens internasionais, ne’ebé Estadu ratifika ka aprova regularmente. Labarik sira hotu, ne’ebé moris husi matrimóniu ka lae, goza direitus no hetan protesaun sosiál ne’ebé hanesan ho sira-seluk. Partisipa iha atividade ida-ne’e, Administradór Postu Administrativu Balibo, Entidades relevantes mak hanesan Saúde, Edukasaun no instituisaun seguransa PNTL.
Mídia MSSI
