Ministériu Solidariedade Sosiál no Inkluzaun – MSSI fó Formasaun Kona-ba Lei Protesaun Labarik no Joven iha Perigu (Lei No 6/2023, 01 de Março 2024) ba membru rede referál no parseiru sira hotu. Formasaun refere loke diretamente husi Ministra Solidariedade Sosiál no Inkluzaun, Verónica das Dores ne’ebé hala’o iha fatin Sentru Formasaun Profesores RAEOA – Santa Rosa-Óe-Cusse, Segunda-feira, (18/03/2024). Formasaun ne’e, fasilita husi MSSI rasik ne’ebé ho total formandus hamutuk ema nain 25 no formasaun sei hala’o durante Loron lima (5).
Lei refere aprova no promulga ona husi Presidente Repúblika. Objetivu kriasaun lei ne’e mak, atu prevene violasaun no proteje direitu ba Labarik no Joven sira nian, liu husi Sistema Protesaun integrál ida ne’ebé mak di’ak.
Iha intervensaun, Ministra Solidariedade Sosiál no Inkluzaun, Verónica das Dores hateten, presiza servisu hamutuk ho liñas ministeriais no parseirus sira hotu hodi proteje labarik no Joven sira iha perigu, hamutuk mós oinsá bele implementa lei ne’e ba grupu vulneravél sira ne’ebé presiza tebes apoiu liu-liu ba sira ne’ebé hasoru violénsia.
Nune’e mós, Diretór Jerál Protesaun Sosiál, Florencio Pina Dias Gonzaga hateten, “formasaun ida ne’e hala’o ho objetivu ida atu membru rede referal no parseirus sira hotu bele kompriende no bele interpreta lei ida ne’e ho di’ak iha terenu. Pontus importante iha Lei Ida ne’e mak, proteje labarik iha risku no perigu. Iha Lei Protesaun Labarik no Joven iha Perigu ida ne’e mós iha buat rua mak importante, primeiru, sistema judisiál no segundu mak, Sistema Protesaun no husi sistema rua ne’e labele separa ba malu maibé tenke la’o hamutuk”.
Partisipa iha Serimónia abertura formasaun ida ne’e mak hanesan, Presidente Institutu Nasionál Seguransa Sosiál – INSS, Arlindo Pinto Diretor Jerál Servisus Korporativus MSSI, Guido Ricardo Belo, Diretór Edukasaun RAEOA, Vicencio Cono, Diretores Nasionais no Xefe Departamentus inklui Asesor Ministra no Vise-Ministra MSSI.