Ministériu Solidariedade Sosiál no Inkluzaun (MSSI), hamutuk ho Fundu Emerjénsia Nasoens Unidas ba Labarik ka United Nations International Children’s Emergency Fund (UNICEF), no The Asia Foundation (TAF) lansa Padraun Prosedimentu Operasionais (PPO) ba Jestaun Kazu Labarik no Jestaun Koordenasaun, hodi suporta vítima Violénsia Bazeia ba Jéneru (VBJ), iha salaun Novu Turizmu, Lecidere Dili, Kinta-feira (18/07/2024).
Liuhusi lansamentu ida-ne’e, bele hametin liután sistema operasaun ba labarik ho ninia foku primária maka, atu fornese orientasaun ba governu no autór protesaun labarik, hodi fornese jestaun kazu ne’ebé efetivu no apropriadu ba protesaun labarik iha Timor-Leste.
“Padraun rua ne’e importante tebes ba Timoroan sira, liuliu iha aspetu sira atu fornese protesaun ba labarik iha Timor-Leste,” katak Ministra MSSI, Verónica das Dores iha eventu lansamentu ne’e.
Iha fatin hanesan, Reprezentante UNICEF iha Timor-Leste, Patrizia DiGiovanni hatete, PPO ida-ne’e hanesan instrumentu prátika ida ba servisu sosiál.
“Tan ne’e, husu ba servisu na’in sosiál sira hotu atu aproveita didi’ak PPO ida-ne’e, hodi fó protesaun ba labarik hotu,” katak Patrizia.
Reprezentante Diretór Pais The Asia Foundation, Hector Salazar Salame, sente orgullu tanba Asia Foundation liu husi Programa Nabilan, bele servisu ho MSSI hodi kontinua fó apoiu no haforsa asisténsia ba Feto no Labarik sira ne’ebé maka iha esperiénsia violénsia.
“Nu’udar onra ida ba Foundation Asia, Programa Nabilan bele suporta kolabora no hakat hamutuk ho MSSI hodi halo autorizasaun ba Padraun Prosedimentu Operasionál kona-ba Jestaun no Koordenasaun hodi suporta ekipa violénsia bazeia ba Jéneru,” tenik nia.
Iha lansamentu ne’e, UNICEF mós entrega Laptop unidade 36 ba MSSI, atu utiliza hodi harii kapasidade ofisiál protesaun labarik, pontu fokal VBJ no departamentu protesaun labarik.
Akompaña Ministra iha lansamentu ne’e, Vise-Ministra MSSI, Céu Brites, liñas ministeriais no parseirus protesaun ba labarik iha Timor-Leste.
Mídia MSSI