Ministériu Solidariedade Sosiál no Inkluzaun (MSSI), hamutuk ho Ministériu Finansas, Ministériu Administrasaun Estatal no Banco Nacional de Comércio de Timor-Leste (BNCTL), asina akordu alterasaun Bolsa da Mãe (BdM) Kondisionál, ho objetivu atu habeer dalan ba pagamentu ba benefisiárius Bolsa da Mãe Kondisionál faze – I tinan 2024. Asina akordu ne’e hala’o iha Edifísiu MSSI-Kaikoli-Díli, Tersa-feira, (16/07/2024).
Ministra Solidariedade Sosiál no Inkluzaun, Verónica das Dores wainhira abertura serimónia asina akordu alterasaun ne’e hatete, governu halo ona alterasaun ba Dekretu-Lei programa apoiu kondisionál Bolsa da Mãe ho kondisaun rua mak hanesan, hasa’e orsamentu no pagamentu laiha fee.
Tanba ne’e, agradese ba BNCTL ne’ebé aseita ona pedidu husi MSSI hodi realiza pagamentu laiha fee, no mós agradese ba lideransa komunitária no lideransa sukus iha teritoriu nasionál, ne’ebé servisu hamutuk ho MSSI halo ejersísiu, hodi ohin loron governu konsege hasa’e orsamentu ba benefisiárius Bolsa da Mãe Kondisionál.
Totál dadus pagamentu benefisiárius Bolsa da Mãe Kondisionál faze – I tinan 2024 hamutuk 54.688 benefisiárius, ho totál orsamentu $5,580,960.00.
Mídia MSSI