Ministériu Solidariedade Sosiál no Inkluzaun (MSSI), hamutuk ho Ministériu Justisa (MJ), lori ksolok natál nian ba komunidade rekluzus iha prizaun Gleno, Munisípiu Ermera. Ksolok natál ida-ne’e nia objetivu atu komunidade prizaun Gleno bele simu natál tinan 2024 ho ksolok no esperansa, ba moris dame no domin, natál lori esperansa, perdaun, kompaixaun, liuhusi Kosok oan Jesus Nia Fuan Mijerikordia.
Iha ksolok natál hamutuk ne’ebé realiza iha Prizaun Gleno, Sesta-feira (13/12/2024) ne’e, Bruder, Nico Lay hato’o mensajen reflesaun tuir Santu Padre nia mensajen ba tinan ida-ne’e katak “Labele Tauk”, tanba laiha ema ida iha mundu ne’e mak laiha sala. Mensajen ida-ne’e enkoraja komunidade prizaun Gleno ho sira-nia família, atu nafatin iha esperansa ba moris ida-ne’ebé nakonu ho dame no domin.
Tempu hanesan, Vise-Ministru Justisa, Paulo Remédios, hato’o mensajen katak, tinan-tinan governu liuhusi MSSI no MJ hamutuk ho parseirus relevante sira, komemora natál hamutuk ho komunidade sira iha prizaun Gleno, Dili no Covalima. Natál hamutuk ida-ne’e nia sentidu katak, governu sei la husik ema ida ba kotuk, katak nia.
Nune’e mós Diretór-Jerál Protesaun Sosiál MSSI, Floréncio Pina Dias Gonzaga, hato’o mensajen Ministra MSSI, Verónica das Dores nian ba komunidade prizaun Gleno, iha tempu hanesan enkoraja komunidade prizaun Gleno atu nafatin tau konfiansa ba MSSI, tanba MSSI liuhusi Diresaun Nasionál Reinsersaun Komunitária, sei apoiu komunidade sira tuir nesesidade ida-idak nian, antes ka hafoin reintegra ba iha sosiedade.
Mídia MSSI
