Ministériu Solidariedade Sosiál no Inkluzaun (MSSI), liuhusi instituisaun tutelada Institutu Nasionál Seguransa Sosiál ninia sub-setór Fundu Rezerva Seguransa Sosiál (FRSS), ne’ebé lidera husi Prezidente INSS-FRSS, Arlindo Pinto, asina akordu kooperasaun ho Banco Central de Timor-Leste (BCTL) ne’ebé lideradu husi Governadór BCTL, Hélder Lopes, iha edifísiu MSSI Kaikoli Dili, Tersa-feira (15/07/2025).
Akordu kooperasaun ne’e nia objetivu atu BCTL nu’udar Entidade Finanseira hodi jere karteira FRSS ho valor kapital montante $ 50,000,000.00 milloens, investimentu espesifikamente iha Klase Ativus Finanseirus hanesan titulu divida publika EUA (Goverment Bonds).
Iha diskursu, Ministra MSSI, Verónica das Dores hatete, FRSS simu responsável eskluzivamente atu akumula no jere rezerva sira husi rejime kontributivu seguransa sosiál nian (transfere anualmente husi INSS), no asegura estabilizasaun finanseira no sustentabilidade rejime ida-ne’e nian hodi bele garante pagamentu futuru pensoens husi kontribuintes aktual sira.
Orsamentu FRSS dezde kriasaun lei ba fundu FRSS, to’o ohin loron iha kapital inisial husi reseitas akumuladu komesa tinan 2017 to’o 2023 hamutuk $ 151,402,538.60 milloens. Iha inísiu tinan 2024, IX Governu Konstitusionál halo Deposito a Prazu iha Banku Komersial sira iha Timor laran tomak hanesan BNCTL, Banku Mandiri, BNU, BRI no ANZ, no iha mós reseitas husi kontribuisaun sira, ho nune’e, kapitál FRSS aumenta ba $ 190,919,533.93 milloens.
Iha tinan ikus 2024, totál kapitál FRSS aumenta ba $ 217,155,229.91 milloens, ne’ebé mai husi reseitas kontribuisaun no reseitas husi investimentu deposita a prazu husi banku komersial sira, no iha inísiu tinan 2025, FRSS nia kapitál aumenta ba $ 233,515,612.83 milloens. Enkuantu husi Janeiru to’o Juñu 2025, FRSS nia kapital aumenta ba $ 262,382,800.88 milloens.
Partisipa iha serimónia asina akordu ne’e, Vise-Ministra MSSI, Céu Brites, kargus xefia INSS-FRSS no superiores sira husi BCTL.
Mídia MSSI
