Ministra Solidariedade Sosiál no Inkluzaun, Verónica das Dores ho Presidente Autoridade Rejiaun Administrativa Espesiál Óe-Cusse Ambeno – RAEOA, Rogerio Tiago Lobato ho komutiva lansa ona pagamentu Pensaun Sosiál ba faze dahuluk periódu 2024. Pagamentu ida ne’e sei hala’o simultañamente iha teritóriu Timor-Leste tomak. Serimónia lansamentu refere hala’o iha Suku Lalisuc-Óe-Cusse, Segunda-feira, (18/03/2024).
Total benefisiárius iha RAEOA ne’ebé simu pensaun sosiál ba faze dahuluk ida ne’e mak, 7043 benefisiárius ho ninia orsamentu $. 1,627,680,00 kompostu husi INVALIDES (129 Benefisiárius) ho ninia orsamentu $. 23,220,00. VELHICE (6914 Benefisiárius) ho ninia orsamentu $. 1,604,460,00.
Pagamentu Pensaun Sosiál ba benefisiárius iha faze dahuluk ba periódu 2024 fahe ba kategória tolu (3) mak hanesan, benefisiárius ho idade 60-69 sei simu $. 60,00 kada fulan, ba benefisiárius ho idade 70-79 sei simu $. 80,00 kada fulan no Benefisiárius ho idade 80 ba leten sei simu $. 100,00 kada fulan, signifika osan ne’ebé benefisiárius simu iha faze ida ne’e aumenta, tanba antes ne’e sira simu deit $.57,00 kada fulan ba ema ida.
Númeru benefisiárius ho ninia orsamentu bazeia ba idade, husi total benefisiárius VELHICE ne’ebé mensiona iha leten mak hanesan tuir mai, husi idade 60-69 iha benefisiárius hamutuk (1771) ho ninia orsamentu $. 318, 780,00. Husi idade 70-79 iha benefisiárius hamutuk (4287) ho ninia orsamentu $. 1,028,880,00. Entretantu husi idade 80 ba leten iha benefisiárius hamutuk (856) ho ninia orsamentu $. 256,800,00.
Ba benefisiárius ne’ebé mak moras no labele desloka ba fatin pagamentu, autoridade komunitária sei alista no entrega ba servisu deskonsentrasaun INSS no Sentru Solidariedade Sosiál Munisípiu hodi koordena ho BNCTL atu halo pagamentu iha benefisiárius sira nia hela fatin hafoin pagamentu normal remata. Ba benefisiárius ne’ebé mate ona/fila ona ba aman Maromak, família sei apresenta deklarasaun óbitu ba BNCTL ne’ebé asina husi autoridade Suku hodi hetan sira nia direitu.
Iha lansamentu ne’e, Ministra Solidariedade Sosiál no Inkluzaun, Verónica das Dores hateten, iha pagamentu ida ne’e sei la kortes benefisiárius sira nia direitus/osan ne’ebé sira simu, tanba kustus ba banku governu mak sei responsabiliza.
“hau husu ba benefisiáriu sira atu utiliza osan ida ne’e ho di’ak hodi hola aihan ou nesesidades bázikas sira ne’ebé presiza, atu goza imi nia restu da vida, la’os uza ba lia no joga”, tenik Ministra.
Entretantu, Presidente Autoridade Rejiaun Administrativa Espesiál Óe-Cusse Ambeno – RAEOA, Rogerio Tiago Lobato hato’o ninia agradesimentu ba Ministra ho nia ekipa tomak, tanba bele kria inisiativa di’ak hodi fasilita pagamentu ba benefisiárius no osan ne’ebé benefisiáriu sira simu ho kompletu no la iha kortes, apresia mós ba servisu MSSI ho BNCTL, tanba pagamentu ida ne’e bele uza banku movél hodi fasilita benefisiáriu sira bele simu iha ida-idak ninia Sukus.
Lansamentu ne’e hetan partisipasaun husi, Presidente Institutu Nasionál Seguransa Sosiál – INSS, Arlindo Pinto, Sekretária Rejionál Asuntu Edukasaun no Solidariedade Sosiál-RAEOA, Inacia Tamele, Diretór BNCTL ho nia ofisiais, Autoridade Komunitária, Diretores Jerais MSSI, Diretores Nasionais no Xefe Departamentus inklui Asesor Ministra no Vise-Ministra MSSI.