Dili, 19 Janeiru 2024 – Ministériu Solidariedade Sosiál no Inkluzaun (MSSI), hamutuk ho Catalpa Internasionál ho Partnership for Human Development (PHD), halo diskusaun hodi buka opsaun atu handover Sistema Jestaun Informasaun Bolsa da Mãe-Jerasaun Foun (BdM-JF), ba data center MSSI.
Diskusaun ne’e lidera husi Vise-Ministra Ministériu Solidariedade Sosiál no Inkluzaun (MSSI) nu’udar Ministra ém Ezersísiu, Céu Brites, ne’ebé akompaña husi Diretór-Jerál Protesaun Sosiál MSSI, Floréncio Pina Dias Gonzaga, hamutuk ho ekipa tékniku Informasaun no Teknolojia (IT) husi parte rua (MSSI-Catalpa), iha salaun ekontru Gabinete Ministra no Vise-Ministra MSSI, Kaikoli.
Iha diskusaun hahú ho aprezentasaun kona-ba Sistema dashboard no aprezentasaun ne’e liga liu ba oinsa bele hetan ideia ruma ne’ebé sai hanesan opsaun MSSI bele eskolla, antes atu halo migrasaun plataforma ba data centre MSSI, ka kopia Sistema ba esternál, para depois atu uza offline ho teknolojia virtuál.
Iha biban ne’e, IT MSSI aseita ho opsaun primeiru, kona-ba halo migrasaun plataforma ba data centre MSSI, tanba opsaun ida-ne’e seguru liu duke opsaun segundu (kopia Sistema ba esternál). Maske nune’e, seidauk iha desizaun finál ba opsaun rua ne’e entre ida ne’ebé mak di’ak liu.
Ho nune’e Ministra Em Ezersísiu orienta ba IT MSSI halo diskusaun no tetu didi’ak ho tékniku sira husi Catalpa no mós PHD, atu bele define opsaun ida-ne’ebé di’ak liu ba MSSI no ba IX Governu, tanba wainhira Sistema ne’e insert ona ba data center MSSI, bele garante ninia utilidade husi governu ida ba governu seluk tuir mai.
Aleinde ne’e mós Diretór-Jerál Protesaun Sosiál, Floréncio Pina Dias Gonzaga reforsa tan, no husu ba IT husi parte rua nian atu hahú Segunda (22/1/2024) diskuti kona-ba opsaun sira ne’e no haree ida ne’ebé mak adekuadu liu, hafoin bele hato’o rekomendasaun sira ba Ministra no Vise-Ministra MSSI hodi hetan aseitasaun.
Catalpa Internasionál servisu hamutuk ho Partnership for Human Development (PHD), finansia husi governu Austrália, haktuir ba programa universál Bolsa da Mãe-Jerasaun Foun, ne’ebé IX Governu Konstitusionál deside la kontinua ona programa ne’e iha tinan fiskál 2024.