Ministériu Solidariedade Sosiál no Inkluzaun (MSSI) Asina akordu ho Parseirus Instituisoens Solidariedade Sosiál (ISS) hamutuk 38 ne’ebé durante ne’e hatutan hela servisu MSSI nian no hetan ona direitu ba utilidade sosiál hodi atende ba komunidade, liu-liu ba grupu vulnerável sira. Asina akordu refere hala’o iha Edifísiu Sentral MSSI, Kaikoli-Díli, Segunda-feira, (17/03/2025). Total instituisoens ne’ebé hetan utilidade sosiál/apoiu orsamentu husi MSSI hamutuk 38 instituisoens ho ninia orsamentu $.2,000,000. Submisaun proposta ISS iha inísiu hamutuk 39 instituisoens, maibé hafoin ekipa hala’o avaliasaun no diskusaun aberta iha proposta husi instituisoens 38 (Uma Mahon 9, Orfonatu 6, Sentru Komunitária 11, Defisiénsia 12) mak Pasa no ida seluk lapasa ho razaun, tanba seidauk priense rekizitus. Ekipa avaliasaun kompostu husi, MSSI, PDHJ, FONTIL, GASC, GIA MSSI no INDDICA.
Iha okaziaun ne’e, Vise-Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino hatete, Governu atribui orsamentu ba ISS, tanba orsamentu ne’e nesesita duni ba ema vulnerável sira nia moris.
“Apresia, tamba imi mak asuwain no parte importante ida, Governu konta nafatin ho imi nia esforsu ne’ebé halo sidadaun hotu-hotu bele sai iguál no lahusik ema ida ba kotuk”, tenik Assanami.
Entretantu, Ministra Solidariedade Sosiál no Inkluzaun, Verónica das Dores hatete, “Hanesan Governu agredese ba instituisoens 38 ne’ebé ohin bele mai asina akordu ho MSSI hodi asegura nafatin apoiu baema ho defisiénsia, vítima violénsia domestika no violénsia bazeia ba jéneru, vítima ba labarik no feto, no seluk tan”.
Mídia MSSI
