Díli 29 Janeiru 2024, Ministra Solidariedade Sosiál no Inkluzaun, Verónica das Dores hala’o vizita ba Centro Nacional de Reabilitação (CNR) Becora ne’ebé tutela ba MSSI.
Objetivu vizita ne’e haree serbisu atendimentu funsionáriu sira ba utente no mós halo enkontru ho Diretór Jerál CNR, Alenxandre Morais ho Diretór Nasionál Administrasaun Finansas no xefi departamentu CNR hodi ko’alia kona-ba atu halo koordenasaun ho Diretór Sentru Solidariedade Sosiál iha munisípiu sira espesifikamente ba (Baucau no Ermera) atu bele haree serbisu desentralizasaun ba munisípiu rua ne’e, hodi bele fasilita liu tán serbisu atendimentu ba Ema ho Defisiénsia.
Hafoin vizita CNR, Ministra MSSI mós kontinua ba SEFOPE hodi halo enkontru kortezia ida ho Sekretáriu Estadu Formasaun Profisionál no Empregu, Rogério Araújo Mendonça iha edifísiu Kaikoli, hodi ko’alia kona-ba preparasaun alargamentu espasu CNR ne’ebé sei uza to’o fatin formasaun lian Koreia SEFOPE Becora.
Antes ne’e iha tinan kotuk, 12 Agostu 2023, Exelénsia Primeiru-Ministru, Kay Rala Xanana Gusmão hamutuk ho Ministra MSSI no Sekretáriu Estadu SEFOPE, vizita no halo ona koordenasaun mudansa fatin formasaun lian Koreia SEFOPE Becora atu nune’e bele komesa alarga edifísiu CNR.
Média Gabinete Ministra e Vice