Ministériu Solidariedade Sosiál no Inkluzaun (MSSI), realiza sorumutu hodi halo avaliasaun ba progresu ezekusaun orsamentu trimestrál dahuluk no daruak, inklui sorumutu Konsellu Konsultivu daruak tinan 2025. Sorumutu rua ne’e abertura husi Ministra MSSI, Verónica das Dores, akompaña husi Vise-Ministra MSSI, Céu Brites.
Enkontru ne’e realiza iha salaun enkontru MSSI Kaikoli Dili, Segunda-feira (14/07/2025).
Iha abertura, Ministra husu ba kargus diresaun xefia sira, husi nasionál to’o munisípius, atu ezekuta osan tuir regras, hodi garante kualidade ezekusaun orsamentu iha trimestrál datoluk no dahaat nian. Ministra mós husu ba kargus diresaun xefia sira, atu koordena servisu ho xefe seksoens, xefe departamentu no funsionáriu sira iha diresaun nia laran, hodi hadi’ak liután prestasaun servisu iha trimestrál datoluk no dahaat nian.
Iha sorumutu ne’e, Diretór Jerál Servisus Korporativus, Fernando dos Reis, hala’o aprezentasaun jerál kona-ba progresu ezekusaun orsamentu husi kada diresoens. Enkuantu Diretores husi kada diresoens nasionais, hato’o mós sira-nia razoens kona-ba viroment ne’ebé sira deside halo iha trimestrál daruak nian.
Ikus liu Diretores Sentru Solidariedade Sosiál no Inkluzaun Munisipais, hato’o sira-nia preokupasaun, ne’ebé hetan resposta imediata husi Ministra no Vise-Ministra, Inklui Diretór Jerál Protesaun Sosiál, Floréncio Pina Dias Gonzaga. Enkontru loron tomak ne’e, hala’o ho susesu atu hadi’ak liután ezekusaun orsamentu iha trimestrál datoluk no dahaat nian.
Mídia MSSI
