Ministra Solidariedade Sosiál no Inkluzaun, Verónica das Dores, la’o ain ho distansia 4km liu hodi vizita maluk vulnerável ne’ebé hela iha laletek Bairu Muzeu, Aldeia Ilimano, Suku Uma-Kaduak, Postu Administrativu Laclo, Munisípiu Manatuto. Vizita ida-ne’e nu’udar atividade rutina ne’ebé Ministra MSSI hala’o, hodi lori atendimentu besik liután ba povu, liuliu atendimentu ho domin ba maluk vulnerável sira.
Vizita ida-ne’e hala’o iha Kinta-feira, (30/10/2025) ho objetivu atu haree besik liután kondisaun moris maluk vulnerável sira hanesan:
️Erois Vivus ️Idozus Abandonadus Ema ho Defisiénsia ️Inan no Oan Abandonadu (divorsiadu) ️Inan Isin-Rua no Inan Fó-Susu ️Uma-Kain Kbiit-Laek ️Família Iha Sirkunstánsia Sosiál ️Vítima Violénsia Bazeia ba Jéneru (VBJ) Uma-Kain Afetadu Dezastre Naturais ️Labarik no Joven Iha PeriguHusi vizita ida-ne’e, Ministra distribui mos apoiu umanitária ba maluk vulnerável sira hamutuk 47 benefisiárius, hodi hatutan moris ba loron balu.
Aproveita biban ida-ne’e, Ministra transmite mensajen S.E. Primeiru-Ministru, Kay Rala Xanana Gusmão ba maluk vulnerável sira katak, S.E. Primeiru-Ministru hakuak ho domin maluk vulnerável sira, maibé tanba nia (Primeiru-Ministru) labele to’o iha Ilimano, maka Ministra Reprezenta Primeiru-Ministru hakuak ho domin maluk vulnerável sira.
Ministra mós husu ba Xefe Sukus no Xefe Aldeias atu hato’o pedidu ba iha Sentru Solidariedade Sosiál Munisípiu Manatuto, bainhira hala’o karik atividades iha Bairru, Aldeias ka Sukus nia laran, tanba MSSI iha ai-han natoon hodi apoiu, salvu husu apoiu ai-han ba festa kazamentu mak labele, katak Ministra.
Alende ne’e Xefi Suku Uma-Kaduak,Fermino Ribeiro da Cruz, hato’o agradese wain ba Ministra Solidariedade Sosiàl no Inkluzaun, Verónica das Dores, tanba durante ukun aan ne’e Membru Governu ida seidauk vizita iha Aldeia Ilimanu, maibe foin primeira vez Ministra MSSI ho fuan bo’ot bele hakbesik aan mai komunidade sira iha Suku Uma-Kaduak.
Mídia MSSI
