Uma-kain ida-ne’e sai ona kliente ba Ministériu Solidariedade Sosiál no Inkluzaun (MSSI), tanba sira-nia situasaun vulnerábilidade ne’ebé presiza hetan atensaun regular. Nune’e mak MSSI ho lideransa Ministra Verónica das Dores nian, vizita regular Uma-kain ida-ne’e hodi haree direta sira-nia situasaun no mós kontinua asegura apoiu ai-han ho apoiu nesesidade uma-laran nian, atu nune’e bele kontinua asegura sira moris iha kondisaun dignu.
Alende apoiu ai-han ho nesesidade uma-laran nian, MSSI mós apoiu Jacinto Kono ba eskola iha Eskola Téknika Vokasional Palaban. Antes ne’e MSSI apoiu Jacinto ho nia feton Erenia ba halo tratamentu iha Centro Nacionál Reabilitação (CNR), tanba ne’e maka MSSI iha obrigasaun hodi kontinua taumatan la’os deit ba sira na’in rua, maibé mós ba sira-nia nia avo mane no avo feto (Terezinha Tolan ho José Ena).
Entretantu Erenia hakarak tuir nia maun Jacinto ba eskola iha Palaban, maibé tanba sira-nia avo mane ho avo feto iha kondisaun defisiénsia no idade abansadu ona, nune’e Erenia deside eskola deit iha Citrana, atu nia bele taumatan ba ninia avo na’in rua.
Erenia ho Jacinto lakon sira-nia inan-aman domin na’in tanba kazu asasinadu husi ema balu, hodi halo sira na’in rua tenke hela ho sira-nia avo nu’udar uma-kain kbiit-laek no vulnerábilidade.
Avo Terezinha mata-been monu bainhra Ministra MSSI hakuhak nia ho domin. Hafoin entrega tiha toba-fatin (spring bed) ba Erenia, Ministra orienta kedas Diretor Sentru Solidariedade Sosiál RAEOA, atu organiza funsionáriu sira ba hadia kuartu ida tau spring bed ba, atu nune’e labele prejudika iha ninia utilizasaun.
Mídia MSSI
