Vise-Ministra Solidariedade Sosiál no Inkluzaun, Céu Brites, partisipa iha selebrasaun kampaña loron 16 ativismu kontra violénsia hasoru feto no labarik feto, ne’ebé ho Objetivu atu hametin liña koordenasaun servisu entre rede referral no komunidade jerál, inklui fahe informasaun ligadu ho Lei Violénsia Doméstika (LVD) no prosesu rede referral ba partisipantes, no mós fó motivasaun ba lider lokál sira hodi prevene no refere kazu violénsia doméstika. Kampaña ida-ne’e realiza iha Sede Suku Guiço, Postu Administrativu Loes, Munisípiu Likisá, Kuarta-feira (04/12/2024).
Iha selebrasaun ne’e, entrega mós manu lokál ba benefisiárius grupu feto sira, hafoin ida ne’e Vise-Ministra ho ekipa tomak hala’o vizita ba manu-luhan ne’ebé kria husi grupu feto sira iha suku refere. Aleinde ne’e, iha mós konsulta Jerál ba inan isin rua no inan fó susu no labarik sira husi pesoál saúde. Kampaña ne’ebé organiza husi ONG Hamutuk Nasaun Saudável (HAMNASA) ne’e ho tema, “Hamutuk Prevene Violénsia Hasoru Feto no Labarik Feto, Timor-leste Livre Husi Violénsia Bazeia Ba Jéneru”.
Mídia MSSI
