Vise-Ministra Solidariedade Sosiál no Inkluzaun, Céu Brites ho nia ekipa hamutuk ho parseirus dezenvolvimentu, autoridades lokais, liñas setorais, organizasoens defisiénsia inklui komunidade munisípiu liquiça, selebra loron mundiál ba Ema ho Defisiénsia-EhD. Objetivu husi selebrasaun ne’e mak, oinsá atu promove no hasa’e konsiensia públiku kona-ba EhD, promove partisipasaun EhD iha moris komunidade no hasa’e konsiensia kona-ba direitu moris EhD. Selebrasaun ne’e hahu ho misa ne’ebé selebra husi amu paróquia São João de Brito Liquiça, Pe. Natalino V. de Sousa Gama, hafoin misa lia nain sira simu bainaka tuir kultura Munisípiu Liquiça nian no kontinua marsa inkluzivu husi igreija to’o Salaun Tokodede Center hodi kontinua ajenda sira seluk. Selebrasaun refere hala’o iha Munisípiu Liquiça, Tersa-feira (03/12/2024).
Kada tinan, iha loron 03 fulan Dezembru, mundu tomak selebra loron importante ida ne’e no selebrasaun iha Timor-Leste ba tinan ida ne’e, hala’o simultaneamente iha 12 Munisípiu inklui RAEOA. Eventu ne’e organiza husi MSSI ne’ebé servisu hamutuk ho Autoridades lokais sira iha Munisípiu ida-idak. Tema mundiál ba selebrasaun iha tinan ida ne’e mak, “HAFORSA LIDERANSA EMA HO DEFISIÉNSIA BA FUTURU IDA NE’EBÉ INKLUZIVU NO SUSTENTÁVEL”.
Mídia MSSI
