Ministra Solidariedade Sosiál no Inkulzaun, Verónica das Dores akompaña Primeiru-Ministru, Kay Rala Xanana Gusmão, marka prezensa iha Simeira (Summits) ASEAN ba dala 44 no 45 ne’ebé hala’o durante loron haat (4) hahú dia 8 to’o 11 Outubru 2024, iha Vientiane, Lao PDR.
Simeira (Summits) ASEAN ba dala 44 no 45 no Lao PDR ne’ebé sai hanesan uma-na’in ka chairmanship no Simeira ne’e rasik lidera husi Primeiru Ministru Lao PDR nian, Sonexay SIPHANDONE ho tema Prinsipál ba Simeira ne’e mak “AUMENTA KONEKTIVIDADE NO REZILIÉNSIA.”
Enkontru nível altu ne’e marka prezensa másimu husi nasaun ASEAN sira inklui Timor – Leste hanesan observadór no simeira entre ASEAN ho nia parseiru sira mak hanesan: Simeira ASEAN – Organizasaun Nasoens Unidas (ONU), Simeira ASEAN – Estadus Unidus Amérika (EUA), Simeira ASEAN – Canada, Simeira ASEAN – Japaun, Simeira ASEAN – Xina, Simeira ASEAN – Korea-du-Sul, Simeira ASEAN – Índia, Simeira ASEAN – Austrália no Simeira Ázia Leste kompostu husi ASEAN, EUA, Canada, Russia, Xina, Japaun, Korea-du-Sul, Uniaun Europeia no Austrália, no simeira relevante sira seluk inklui Timor-Leste hanesan observadór.
Husi kada enkontru ne’ebé iha, prezidente Sonexay SIPHANDONE sempre fó tempu ba Timor – Leste ne’ebé lidera direita husi S.E. Primeiro Ministru Kayrala Xanana Gusmão hodi hato’o intervensaun hanesan observadór.
