Ministra Solidariedade Sosiál no Inkluzaun, Verónica das Dores, tesi fita ofisialmente hodi inaugura Unidade Banco Nacional de Comércio de Timor-Leste (BNCTL), iha edifisiu Institutu Nasionál Seguransa Sosiál no Fundu Rezerva Seguransa Sosiál (INSS-FRSS) Kaikoli Dili, Tersa-feira, (16/07/2024).
Inaugurasaun ida-ne’e simplifika pasu ida tan iha servisu atendimentu BNCTL nian ba públiku, liuliu ba benefisiáriu sira husi programa subsídiu ba idozus no ema ho defisiénsia, inklui ba labarik sira liuhusi programa apoiu kondisionál Bolsa da Mãe, ne’ebé hetan atendimentu husi BNCTL, dehan Ministra iha ninia intervensaun badak.
Nune’e mós Reverendisimu Pe. Rienel Nachimma, SDV, hafoin fó bensaun ba Unidade BNCTL ne’e hatete, “bensaun signifika agradesimentu ba buat di’ak hotu ne’ebé Nai haraik mai ita. Bensaun mós signifika kuidadu ho didi’ak”, katak Pe. Rienel.
Entretantu Prezidente INSS-FRSS, Arlindo Pinto liuhusi ninia intervensaun, hato’o agradesimentu ba BNCTL, tanba bele estabelese ona Unidade ida iha INSS-FRSS. Ho unidade ida-ne’e, bele fasilita di’ak liután benefisiáriu sira atu asesu ba banku ho lalais.
Ikus liu, Prezidente Konsellu Administrasaun BNCTL, Lúcia da Cruz Flor iha ninia diskursu hatete, ho inaugurasaun ida-ne’e, bele fasilita di’ak liután benefisiáriu sira atu foti sira-nia osan. “BNCTL nu’udar parseiru importante ne’ebé hakarak atu hakbesik an ba ema hotu-hotu, tanba ita sai hanesan feramenta ne’ebé esensiál ba Estadu”, tenik Lúcia.
Akompaña Ministra iha inaugurasaun ne’e, Vise-Ministra Solidariedade Sosiál no Inkluzaun, Céu Brites, Reprezentante Gabinete Vise Primeiru Ministru ba Asuntu Sosiál, reprezentante husi liñas ministeriais, Prezidente INSS-FRSS, Pe. Rienel Nachimma, Estrutura BNCTL no Reprezentante husi banku komersiál sira iha Timor-Leste.
Mídia MSSI