DILI, 29 Janeiru 2024 – Ministra Solidaridade Sosiál no Inkluzaun (MSSI), Verónica Das Dores, hala’o vizita kortezia ba Institutu Nasionál Seguransa Sosiál (INSS), ho objetivu atu hato’o bem vindu no deseja servisu di’ak ba atuál Prezidente INSS, Arlindo Pinto ho nia ekipa tomak.
Perante vizita, Ministra MSSI mós, husu ba funsionáriu tomak atu respeita no tama servisu tuir oras ne’ebé determina ona.
“ Ita servisu tenke tama 8.00otl, se ema ida mai 9.00-10.00otl, ita la’ós kontrola absénsia maibé ita mai iha ne’e atu hatudu komitmentu servisu, tanba ita mai servisu iha ne’e ho saláriu ne’ebé boot, bainhira sira ne’ebé maka saláriu ki’ik mai tuir oras, maibé sira ne’ebé maka saláriu boot mai la tuir oras, ida ne’e la justu,” hato’o Ministra, iha ámbitu vizita kortezia INSS.
Ho nune’e, Ministra MSSI husu ba Prezidente Institutu Nasionál Seguransa Sosiál, Arlindo Pinto atu tau atensaun másimu ba asuntu ida ne’e.
“ Ha’u husu ba Prezidente INSS, atu tau atensaun ba asuntu ida ne’e, ha’u hakarak haree ida ne’e,” Ministra husu.
Ministra mós husu funsionáriu hotu servisu ho fuan no domin, tanba Timor-Leste ne’e ita hotu nia rain, tanba bainhira país ida ne’e atu ukun aan, eroi sira sosa ho ruin no raan maka foin hetan.
Akompaña Ministra iha vizita ne’e, Diretóra Ezekutiva INSS, Diretór Finansas INSS, Diretora Nasionál Protokolu, Komunikasaun no Relasaun Públika MSSI inklui Asesór sira husi Gabinete Ministra.
Média Gabinete Ministra e Vice