BONONARO, 28 Juñu 2024, Ministra Solidaridade Sosiál no Inkluzaun, Verónica das Dores ho Ministra Saúde, Élia dos Reis Amaral reprezenta IX Governu Konstitusionál akompaña Primeiru Ministru (PM) Kay Rala Xanana Gusmão iha serimónia inaugurasaun Centro Sosial Padre Manuel Nunes Formigão, ne’ebé hala’o iha Suku Tapo Memo, Postu Administrativu Maliana, Munisípiu Bobonaro, Sesta (28/6/2024).
Serimónia inagurasaun ne’e koa fita husi Primeiru-Ministru, Kay Rala Xanana Gusmão akompaña husi Prezidente Fundasaun no Diretora do Centro Social, Irmã Cristina Macrino no bensaun husi Amu Paroku Maliana, Pe.Valeiro Gusmão.
Primeiru-Ministru, Kay Rala Xanana Gusmão liu hosi diskursu hatete, problema boot ne’ebé Timor Leste infrenta mak kualidade edukasaun, tanba falta profesór sira no menus kualidade. Tanba ne’e, Xefe Governu hato’o agradese wa’in tebes ba doadór sira nia apoiu, inklui mós madre sira nia tulun hodi harii sentru formasaun ka centro social atu forma timoroan sira, liu-liu labarik sira, jerasaun foun sira atu sai matenek nu’udar aset ba Timor atu lori Timor-Leste ba oin.
“Ha’u kontenti mai iha ne’e, ita hotu hamutuk inaugura fatin ida ne’e, Centro Social Padre Manuel Nunes Formigão. Bainhira ami hasoru malu iha Konsellu Ministru, ko’alia kona-ba problema edukasaun, falta profesór no falta kualidade profesór sira nian. Ha’u hatene profesór sira balun husi Maliana ba Díli halo protesta, maibé ita tenke tuir regra. Ita tenke prepara ita-nia labarik sira ho kualidade, hadi’a sira nia mentalidade liu hosi formasaun sira,” katak Xefe Governu Kay Rala Xanana Gusmão.
Iha fatin hanesan, Ministra Solidariedade Sosiál no Inkluzaun, Verónica das Dores hatete katak, konstrusaun ne’ebé di’ak iha nasaun ida hatudu katak, nasaun ne’e iha prosperiedade, paz no inkluzaun, valor aban-bainrua nian ba futuru jerasaun foun.
“Ha’u husi ministériu ida ne’ebé haree ba feto faluk, oan ki’ak no sira ne’ebé hasoru problema oi-oin iha fatin-fatin wainhira IX Governu simu posse hahú iha dia 1 Jullu 2023, ema rihun atus mak tanis no fakar mataben ba governu ida ne’e ninia kabaas, maibé atu hateten iha ne’e katak ohin obra ida ne’e sai mós sasin ba ami-nia responsabilidade ba ema moris sira no ba martires no eroi sira nia ran, iha ema rihun atus ida resin nia kontribuisaun ba ita nia ukun rasik aan.
Konstrusaun nasaun no konstrusaun estadu ne’e presiza prepara ita-nia jerasaun foun para aban bainrua lori ita-nia nasaun ne’e prósperu, inkluzivu, paz no armonia. Ita harii eskola ida ne’e, liu husi madre sira hamutuk ho instituisaun solidariedade sosiál, ita preara ita-nia jerasaun foun sira ne’ebé kualidade iha futuru,” dehan Ministra Verónica das Dores.
Nia hatutan tan katak, nu’udar Timoroan tenke halo buat ruma ba futuru nasaun ida ne’e. Iha misaun rua mak Timoroan sira tenke hala’o mak responsabilidade ba ema atus ba atus ne’ebé mak mate ba rai ida ne’e, tanba nasaun ida ne’e harii ho ran no ruin.
“Iha Ásia Pasífiku, Timor-Leste ema haree nasaun ki’ik oan ida mak la serve no la vale. Tanba ne’e, ha’u lori Ministériu Solidariedade Sosiál no Inkluzaun nia naran hato’o agradese wain ba ita boot sira nia kontribuisaun ba rai ida ne’e hodi harii centro social ida ne’e. Ida ne’e ami labele selu, maibé hakerek hela iha lalehan no hakerek mós iha rai ida ne’e,” tenik Ministra Verónica.
Nune’e mós Prezidente Autoridade Munisípiu (PAM) Bobonaro, Alexandre hato’o agradese wa’in ba fundasaun madre sira nian ne’ebé ho esforsu tomak no tau forsa hamutuk bele harii centro social ka sentru formasaun iha Munisípiu Bobonaro.
“Ha’u lori povu no autoridade lokál sira nia naran, hato’o agradese wa’in ba Prezidente Fundasaun no Diretora Centro Social ne’ebé ho domin tomak, domin ba povu Bobonaro hodi harii sentru formasaun ida ne’e,” katak Alexandre.
Partisipa iha atividade inaugurasaun Centro Social iha Suku Tapo Memo, Postu Administrativu Maliana, aleinde membru IX Governu Konstitusionál, Prezidente Autoridade Munisípiu Bobonaro, Embaixadora Portugal, Diretor Jerál MSSI, Xefe Suku Tapo Memo, Diretór MSSI Munisípiu Bobonaro no estudante no komunidade Memo.
Média Gabinete Ministra e Vice
See less
